تجربة شراء من موقع Pernia’s pop-up shop

---

السلام عليكم ورحمة الله وبركاته

عدنا لكم بتجربة شراء جديدة من موقع Pernias Pop-Up Shop وهو موقع هندي مملوك للمصممة الهندية بيرنيا كوريشي..

يجمع الموقع أيضاً تصاميم مختلفة من ملابس وشنط وصنادل واكسسوارات لمجموعة من دور الأزياء الهندية الشهيرة..

يعرض الموقع البضاعة بالدولار الأمريكي وممكن تغيير العرض لعملات أخرى (١٠ عملات تقريباً) لكن عند الدفع يحاسب بالروبية الهندية إما عن طريق الفيزا أو الباي بال، وأهم ما يميز الموقع ان الشحن مباشر عن طريق DHL او UPS وغيره..

عرض الفساتين عندهم كبير جداً لكن أغلبها “Made to order” يعني يخيطونها بعد الطلب وهذا ياخذ وقت تقريبا ٤ إلى ٥ أسابيع بعدها الشحن اسبوع تقريبا على ما يوصل.. يعني لو كان عندكم مناسبة اطلبوا من بدري من قبلها بشهر ونص عشان تكون اكيد واصلة ..

اخترت فستان بعد لفة طويلة بالموقع من المصممة بيرنيا كوريشي Black Golden Stone Embellished Draped Gown ،عندهم خيارين بالمقاسات إما المقاسات العالمية S,M,L أو مقاس مخصص، لمن شفت صفحة المقاسات بالإنش لقيت مقاسي بين السمول والميديم، حطيت مقاس مخصص طلعتلي قائمة طويلة تُعبأ لكل مقاسات الجسم إما بالانش أو السانتي، شفت القائمة شوي طويلة وطالبين مقاسات مو  مرة ضرورية وخفت اغلط ببعضها  فراسلتهم بالايميل وعطيتهم رقم المنتج والمقاسات الضرورية لموديل الفستان وقلت لهم اني ما اقدر اعبي كل المقاسات اللي طالبينه..

كانوا متعاونين جداً وخدمتهم سريعة ارسلوا لي مجموعة من المعلومات اللي يحتاجونها لإتمام الطلب مثل الاسم ورقم المنتج والمقاسات وعنوان الشحن ورقم الجوال والإيميل، عبيت المعلومات كاملة وارسلتها..

ارسلوا بعده بيومين تقريباً ع الايميل الفاتورة برابط للدفع بالباي بال، تممت العملية وتم الطلب.. انتظرت شهر بالضبط، بعدها شحنوها على UPS وارسلوا رقم التتبع، ٥ او ٦ ايام ووصلت للبيت أخيراً ..

 

التغليف مرة ممتاز وفوق التقييم  ، أول مرة يوصلني شيء تغليفه بهذا التميز رغم انه UPS مو ذاك الاهتمام بالكراتين دايم اللي يوصلني عن طريقهم يكون الكرتون معفوس شوي..

مثل ما شايفين بالصور الكرتون على قد الفستان وفاتني تصوير البلاستيك اللي كان الكرتون مغلف فيه، بلاستيك متين جداً على مقاس الكرتون بالضبط يدخل فيه كأنه شنطة، والكرتون ملصق زين بالشريط الفوشي، ومثل ما هو واضح تغليف الفستان من جوا وحاطين من فوق الفستان وتحته اسفنج مغلف للحماية، اقولكم شي مميز..

 

طلع الحمد لله الفستان مقاسي بالضبط ما يحتاج أي تعديل، والتصميم نفس الصورة بالضبط، شي واحد مختلف عن توقعي وهو نوعية القماش الأسود، بالصورة شكله اشهب شوي وهذا اللي كان مرددني بالفستان، طلع بالعكس القماش فيه لمعة ولمعته على ذهبي وعيبه الوحيد انه خفيف يعني ممكن ينشق مو شفاف..

أخيراً تقييمي للموقع بشكل عام ١٠\١٠، تصاميمه متنوعه وموديلاته كثيرة وجديدة وغير تقليدية..

أنصحكم فيه بقوة  .. نلقاكم لاحقاً في تجربة جديدة بإذن الله…